“የስኬታችን ዋናው ሚስጥር መደማመጣችን እና መከባበራችን ነው ” አሰልጣኝ ፍሬው ኃ/ገብርኤል

የኢትየጵያ ሴቶች ፕሪሚየር ሊግ ትላንት ፍፃሜውን አግኝቷል፡፡ ደደቢትም የቻምፒዮንነቱን ዘውድ ደፍቷል፡፡

አሰልጣኝ ፍሬው ከድሉ በኋላ ከሶከር ኢትዮጵያ ጋር አጭር ቆይታ አድርገዋል፡፡

ውድድሩ እንዴት ነበር?

በጣም ደስ ይል ነበር ፤ ሁሉንም ጨዋታ በማሸነፍ ነው ቻምፒዮን የሆንነው፡፡ ለሀዋሳ ስፖርት አፍቃሪ ትልቅ ክብር አለን፡፡ ጥሩ የሚጫወቱትን እየደገፈ ፤ ሀገርን ወክለው የሚጫወቱትን እነ ሎዛን በዚህ መልክ ማነቃቃቱ ነገ ጥሩ ተጫዋቾችን ለማውጣት ጥሩ አስተዋጽኦ ይኖረዋል ብዬ አስባለው፡፡ በአጠቃለይ ውድድሩ ደስ የሚል ነበር፡፡

የዞኑ እና አጠቃላይ ቻምፒዮን ሆናችኀል…

ኦ እጅግ በጣም ነው ደስ ያለኝ፡፡ ለዚህ ስኬት ፈጣሪዬን በጣም አመሰግናለው፡፡

በመጀመርያ የውድድር ዘመንህ ዋንጫ አንስተሀል፡፡ የስኬትህ ሚስጢር ምንድን ነው?

እዚህ ክለብ ከመጣሁ ጀምሮ ያደረጉልኝ አቀባበል በጣም ደስ ይል ነበር፡፡ ያው እኔ ሲሪየስ ነኝ ፤ ስቆጣም ፣ ስናገርም በቀናነት ነበር የሚያዳምጡኝ፡፡  እንደ አሰልጣኝ እና እንደ ተጨዋች ሳይሆን እንደ ቤተሰብ ነበርን፡፡ ደግሞም ብዙም ለጥፈት የተጋለጡ አይደሉም፡፡ ስራቸውን በሚገባ ያውቃሉ ፤ ክብራቸውን ይጠብቃሉ፡፡ ለስኬታችን ዋናው ሚስጥር መዋደደችን ፣ መደማመጣችን እና መከባበራችን ነው፡፡

ሴቶችን ማሰልጠን እንዴት አገኘኸው?

ሴቶችን ማሰልጠን የመጀመርያዬ ይሁን እንጂ ወንዶችን ለረጅም ጊዜ በፕሮጀክት ሳሰለጥን ነበር፡፡ ዛሬ ለክለብና ለብሔራዊ ቡድን በመጫወት ላይ የሚገኙ ተጫዋቾችን አውጥቻለው፡፡ አለማያ ዩንቨርሲቲ በስፖርት ሳይንስ ድግሪ አለኝ ፤ በአጠቃለይ በስፖርቱ ጥሩ ልምድ አለኝ፡፡

ወደ ሴቶቹ ስመጣ ሴቶችን  ማሰልጠን ከባድ ነው፡፡ ሆኖም ለስራ የተዘጋጀ  ፈጣን ጭንቅላት አላቸው ፤ አልሸነፍ ባይነታቸው ይገርማል፡፡ ከዚህ በኋላ ሙያውን ስለምወደው  በሴቶች ላይ ጠንካራ ስራ ሰርቼ ለሀገሬም ለክለቤም ጥሩ ሰራ እሰራለው ብዬ አስባለው፡፡