በፋሲል ከነማ በተከላካይነት እና በአማካይ ተከላካይ ቦታ ላይ ሲያገለግል የቆየው ከድር ኩሊባሊ ውሉን ለአንድ ተጨማሪ ዓመት አድሷል፡፡
የ2013 የቤትኪንግ የኢትዮጵያ ፕሪምየር ሊግ የዋንጫ ባለቤት በመሆን በካፍ የቻምፒየንስ ሊግ ዋንጫ ውድድር ላይ የሚሳተፈው ፋሲል ከነማ አስቻለው ታመነን፣ ኦኪኪ አፎላቢ እና አብዱልከሪም መሐመድን በማስፈረም እና የዳንኤል ዘመዴ፣ ኪሩቤል ኃይሉ እና የማሊ ዜግነት ያለውን ግብ ጠባቂ ሚኬል ሳማኪን ውል ደግሞ ማራዘሙ ይታወሳል፡፡ረፋድ ላይ የ2013 የዓመቱ ምርጥ ግብ ጠባቂን ውል ያደሰው ክለቡ ከሰአት ደግሞ ከድር ኩሊባሊ ለአንድ ተጨማሪ ዓመት እንዲቆይ ማስፈረሙን አሰልጣኝ ስዩም ከበደ ለሶከር ኢትዮጵያ ገልፀዋል፡፡
የቀድሞው የደደቢት ተጫዋች ወደ ፋሲል ከነማ ቤት ካመራ በኋላ ከአማካይ ተከላካይ ስፍራ ወደ ተከላካይነት ቦታ መለስ ብሎ ከአጣማሪው ያሬድ ባዬ ጋር በመጫወት ክለቡን ሻምፒዮን ማድረግ ችሏል። አይቮሪኮስታዊው ሁለገብ ተጫዋች በድጋሚ ለተጨማሪ ዓመት በጃኖ ለባሿቹ ቤት እንደሚቀጥል የተረጋገጠ ሲሆን ክለቡም የሦስት የውጪ ተጫዋቾችን ኮታ ሙሉ ለሙሉ መጠቀሙ ተረጋግጧል፡፡
