በአፍሪካ ዋንጫ የምድብ ማጣሪያ የመጨረሻ ጨዋታ ኮንጎ ዲ/ሪ ከኢትዮጵያ ጋር የሚያደርጉትን ጨዋታ የምዕራብ አፍሪካዊቷ ሀገር ዳኞች ይመሩታል።
በ2025 ሞሮኮ ለምታስተናግደው የአፍሪካ ዋንጫ ለማለፍ የአህጉሪቱ ብሔራዊ ቡድኖች በምድቦች ተከፋፍለው የማጣሪያ ጨዋታዎችን ሲያደርጉ የሰነበቱ ሲሆን የምድብ የመጨረሻ ጨዋታቸውንም ከትናንት ዕለት ጀምሮ እያከናወኑ ይገኛሉ።
በምድብ 8 ከዲ/ሪ ኮንጎ፣ ጊኒ እና ታንዛኒያ ጋር ተደልድሎ በአምስት የምድብ ጨዋታዎች ከአንድ ነጥብ በላይ ማስመዝገብ ሳይችል ከምድቡ መውደቁን ያረጋገጠው የኢትዮጵያ ብሔራዊ ቡድን በምድብ ጨዋታዎች ማግኘት ከሚገባው አስራ አምስት ነጥቦች አስራ ሦስቱን በማሳካት የምድቡ መሪ ከሆነው የዲ/ሪ ኮንጎ ብሔራዊ ጋር ከመርሐ-ግብር ማሟያ ብዙም ያልዘለለ ፋይዳ የሌለውን ጨዋታ ዛሬ ምሽት 1 ሰዓት ያከናውናል። ይህንን ጨዋታም የኬፕ ቨርድ አልቢትሮች እንደሚመሩት ያገኘነው መረጃ ያመላክታል።
በዚህም ጨዋታውን በመሐል አልቢትርነት ሊዮኔዳስ ዳ ግራሳ ከረዳቶቻቸው ጄሪ ሎፕስ እና ሂሊዮ ሴሜዶ እንዲሁም ከአራተኛ ዳኛው ሌኒን ሮቻ ጋር በመሆን ይመሩታል።
ሁለቱ ብሔራዊ ቡድኖች ጳጉሜ 4 ባደረጉት የምድቡ የመጀመሪያ ጨዋታ የዲ/ሪ ኮንጎ ብሔራዊ ቡድን 2ለ0 በሆነ ውጤት ማሸነፉ አይዘነጋም።
