በምሽቱ ተጠባቂ መርሃግብር ቡናማዎች የጣናውን ሞገድ በመርታት ዳግም ወደ ድል መመለስ ችለዋል።
ኢትዮጵያ ቡና በ16ኛው ሳምንት በኢትዮጵያ መድን ሽንፈት ካስተናገዱበት ቋሚያቸው ሁለት ለውጦችን በማድረግ አንተነህ ተፈራን እና እስራኤል ሸጎሌን አሳርፈው አማኑኤል አድማሱ እና ኮንኮኒ ሃፍዝን ይዘው ሲገቡ ባህርዳር ከተማዎች በተመሳሳይ ባሳለፍነው ጨዋታ ሳምንት ከመቻል ጋር ነጥብ ከተጋሩበት ቋሚ ስብስባቸው ሁለት ለውጦችን አድርገው ሲቀርቡ በለውጦቹ ወንድሜነህ ደረጀን እና ሄኖክ ይበልጣልን በፍፁም ፍትህዓለሙን እና ጂሮም ፈሊፕ ተክተዋል።
በጥሩ የጨዋታ እንቅስቃሴ ጅማሮውን ያደረገው የምሽቱ ጨዋታ ገና በማለዳው ነበር የግብ ሙከራዎችን ማስመልከት የጀመረው በስድስተኛው ደቂቃ ቡናማዎቹን ቀዳሚ መሆን የቻሉበትን ግብ አግኝተዋል።
ኦካይ ጁል ከራሳቸው የሜዳ ክልል በረጅሙ የጣለውን ኳስ ኮንኮኒ ሀፍዝ ፍጥነቱን እና ጉልበቱን ተጠቅሞ ደርሶ እየገፋ ሳጥን ውስጥ ገብቶ በሁለት ባህርዳር ከተማ ተከላካዮች መሃል ወደ ግብ የላካት ኳስ ቡናማዎቹ መሪ እንዲሆኑ አስችሏቸዋል።
የግቧ መቆጠር ያነቃቃቸው ባህርዳሮች በእርጋታ ኳስ በማንሸራሸር ረገድ ጥሩ ሲንቀሳቀሱ ቆይተው በስተመጨረሻም በ15ኛው ደቂቃ የአቻነት ግብ አግኝተዋል ፤ ከማዕዘን ምት የተሻማውን ኳስ ሙጂብ ቃሲም በግንባሩ ገጭቶ መረብ ላይ በማሳረፍ ቡድኑን አቻ አድርጓል።
የአቻነት ግብ መቆጠሩ የቡናማዎች ጫና አጠናክሮ ቀጥሎ በአጫጭር ቅብብል በተደጋጋሚ ወደ ሶስተኛው ሜዳ ክፍል ደርሰው ሙከራዎችን አድርገዋል።
በአንፃሩ ባህርዳር ከተማዎችም በረጃጅም ኳሶች በመልሶ ማጥቃት ወደፊት ለመግባት ሲጥሩ ቢስተዋሉም ጫን ብለው ሙከራዎችን በማድረግ አኳያ ብልጫ ተወስዶባቸዋል።
ፍፁም የጨዋታ እንቅሰቃሴ ብልጫን የወሰዱት ቡናማዎቹ ተጨማሪ ግብ ለማስቆጠር ግብ ማነፍነፋቸውን ቀጥለው ጨዋታው 36ኛው ደቂቃ ላይ ሲደርስ ዳግም መሪ መሆን የቻሉበትን ግብ አስቆጥረዋል ፤ በፍቃዱ ዓለማየሁ በግራ መስመር በኩል ወደ ግብ ያሻገረውን ኳስ ፍፁም ፍትህዓለሙ ኳሱን ለማራቅ ጥረት ሲያደርግ ኳሱ ተጨራርፎ ኮንኮኒ ሃፍዝ ብቻውን ሆኖ አግኝቶ በቀላሉ በግንባሩ ገጭቶ ወደግብነት ቀይሯት አጋማሹም በቡናማዎች መሪነት ተገባዶ ወደ መልበሻ ክፍል ገብተዋል።
በሁለተኛው አጋማሽ ጠንከር ብለው የተመለሱት ባህርዳር ከተማዎች በኳስ ቁጥጥርም ሆነ የግብ ማግባት አጋጣሚዎችን በመፍጠር ብልጫ ወስደው ተደጋጋሚ ሙከራዎችን አድርገዋል ፤ በተለይም 60ኛው ደቂቃ ላይ በቅብብል ተገኘውን ኳስ ሙጂብ ቃሲም ከግብ ጠባቂ ጋር ፊትለፍት ተገናኝቶ ሳይደርስባት የቀረችው አስቆጪዋ አጋጣሚ ስትታወስ በ80ኛው ደቂቃ ላይ በረጅሙ የተጣለውን ኳስ ቸርነት ጉግሳ በግንባሩ ገጭቶ ያደረገው ሙከራ የቡናማዎቹ ግብ ጠባቂ ዳንላድ ኢብራሂም በግሩም ቅልጥፍና ወደ ውጪ ያወጣባቸው ሌላኛው ለግብ የቀረበ ሙከራ ተጠቃሽ ነበር።
ኢትዮጵያ ቡና በአንፃሩ በሁለተኛ አጋማሽ በመልሶ ማጥቃት አንዳንዴ ወደፊት ለመሄድ ጥረት ያድርጉ እንጂ በእንቅስቃሴም ሆነ የግብ አጋጣሚዎችን በመፍጠር ረገድ ዳካማ ሆነው ቢያመሹም በ89ኛው ደቂቃ ላይ በቅብብል የተገኘውን ኳስ ተቀይሮ ወደሜዳ የገባው አንተነህ ተፈራ ፍጥነቱን ተጠቅሞ ወደ ግብ ክልል እየገፋ ይዞ ገብቶ መሬት ለመሬት ወደ ግብ መጥቶ ከመረብ ጋር አገናኝቶ መሪነታቸውን አስፍተው ጨዋታውን 3-1 በሆነ ውጤት ማሸነፍ ችለዋል።
