አስቻለው ታመነ እና የፕሪሚየር ሊጉ ኮከብ ተጫዋቾች

የኢትዮጵያ እግርኳስ ፌዴሬሽን በሊጉ ድንቅ አቋም ላሳዩ ተጫዋቾች ሽልማት መሰጠት የጀመረው በ1977 አም. ነው፡፡ በዚህ ጽሁፍ የኮከብ ተጫዋቾችን ዝርዝር እና ተያያዥ እውነታዎችን እናቀርባለን፡፡

የመጀመርያው ኮከብ

ይህ ሽልማት በ1977 መሰጠት ሲጀምር የመጀመርያውን ሽልማት በማግኘት ባለታሪክ የሆነው የቅዱስ ጊዮርጊሱ ተከላካይ ዳኛቸው ደምሴ ነበር፡፡

ሽልማቱን ከአንድ ጊዜ በላይ ያሳኩ ተጫዋቾች

በ31 አመታት የኮከብ ተጫዋች ምርጫ ታሪክ ሽልማቱን ከአንድ ጊዜ በላይ በመውሰድ ባለታሪክ የሆኑት የቅዱስ ጊዮርጊሱ ሙሉጌታ ከበደ ፣ የኢትዮጵያ ቡናው አሸናፊ ግርማ ፣ ጌታነህ ከበደ (በደቡብ ፖሊስ እና ደደቢት) ፣ የኤሌክትሪኩ አንዋር ሲራጅ እና የቅዱስ ጊዮርጊሱ ደጉ ደበበ ሲሆኑ ሁለት ጊዜ ሽልማቱን ማንሳት ችለዋል፡፡

አንዋር ሲራጅ

አንዋር ሲራጅ ሊጉ በ1990 በአዲስ መልኩ ከመጀመሩ በፊት እና በኋላ ሽልማቱን የወሰደ ብቸኛ ተጫዋች ሆኖ ተመዝግቧል፡፡ የቀድሞው የኤሌክትሪክ እና ቅዱስ ጊዮርጊስ ተከላካይ በ1989 እና 1992 የኮከብ ተጫዋችነት ክብርን ተቀዳጅቷል፡፡

ብቸኛው ግብ ጠባቂ

የመከላከያው ግብ ጠባቂ ጀማል ጣሰው በ31 አመት ታሪክ ሽልማቱን ያገኘ ብቸኛው ግብ ጠባቂ ነው፡፡ ጀማል ጣሰው ሽልማቱን ያገኘው በ2002 በደደቢት ማልያ ነበር፡፡

ጣምራ ሽልማት

ሙሉጌታ ከበደ ፣ ማትያስ ሃይለማርያም ፣ አዳነ ግርማ ፣ ጌታነህ ከበደ እና ኡመድ ኡኩሪ በአንድ አመት የኮከብ ተጫዋችነት እና ኮከብ ግብ አስቆጣሪነት ሽልማትን በጣምራ በመውሰድ ባለ ታሪክ ናቸው፡፡ አህመድ ጁንዲ ፣ ታፈሰ ተስፋዬ እና አሸናፊ ሲሳይ በተመሳሳይ አመት ባይሆንም በተለያዩ ጊዜያት ሁለቱንም ሽልማቶች ማግኘት ችለዋል፡፡