የኢትዮጵያ ከፍተኛ ሊግ ዛሬ ከወራቤ ከተማ ጋር ተስተካካይ ጨዋታውን ያደረገው ጅማ አባ ቡና ካለ ግብ አቻ ተለያይቶ ወደ ፕሪሚየር ሊግ መግባቱን ከወዲሁ አረጋግጧል፡፡
ከ25 ጨዋታዎች 61 ነጥቦችን የሰበሰበው ጅማ አባ ቡና 3ኛ ደረጃ ሊላይ ከሚገኘውና 26 ጨዋታ ካደረገው ወራቤ ከተማ በ13 ነጥቦች ርቆ በመቀመጡ ለከርሞ ወደ ሃገሪቱ ትልቅ ሊግ መሸጋገሩን አረጋግጧል፡፡
በ1947 በጅማ እርሻ ኮሌጅ አማካኝነት የተመሰረተው ጅማ አባ ቡና ከአመታት በፊት ከኢትዮጵያ እግርኳስ ካርታ ጠፍቶ በ2006 እንደገና በመመስረት በ3 አመታት ውስጥ ወደ ፕሪሚየር ሊጉ አድጓል፡፡
ጅማ አባ ቡና ወደ ፕሪሚየር ሊግ ያደገ በታሪክ የመጀመርያው የጅማ ክለብ ሲሆን በፕሪሚየር ሊጉ የተሳተፈ 43ኛው ክለብ ለመሆን በቅቷል፡፡ በ1990ዎቹ መጀመርያ ጥቂት የሙገር ሲሚንቶ ጨዋታዎችን ከማስተናገድ ውጪ በፕሪሚየር ሊጉ ስም የሌላት ጅማ ከተማም በቀጣዩ አመት በሊጉ የሚወክላት ክለብ አግኝታለች፡፡
በጅማ አባቡና ወደ ፕሪሚየር ሊግ ማደግ ዙርያ ከክለቡ አሰልጣኝ እና ተጫዋቾች ጋር ያደረግነውን ቃለ ምልልስ ከቆይታ በኋላ ይዘን እንመለሳለን፡፡
