የ2014 የከፍተኛ ሊግ ክለቦች የምድብ ድልድል ይፋ ሆኗል

በሦስት ምድብ ተከፍሎ ታህሳስ ወር መጀመርያ ላይ እንደሚጀመር የሚጠበቀው የከፍተኛ ሊግ ክለቦች የምድብ ድልድል ተለይቶ ታውቋል።

የ2014 የውድድር ዘመን የከፍተኛ ሊግ ክለቦች የዕጣ ማውጣት ሥነ ስርዓት እና የደንብ ውይይት የፌዴሬሽኑ አካላት ተሳታፊ ክለቦች በተገኙበት በጁፒተር ሆቴል ተካሂዷል። ክፍያ የፈፀሙ 23 ክለቦች ብቻ የዘንድሮ ውድድር እንዲካፈሉ ሲደረግ ጋሞ ጨንቻ፣ አቃቂ ቃሊቲ፣ ወላይታ ሶዶ፣ ከንባታ ሺንሺቾ፣ አርሲ ነገሌ፣ ኮልፌ ቀራኒዮ፣ ጅማ አባቡና ክፍያ ባለመፈፀማቸው ከውድድሩ ውጪ ተደርገዋል። እስከ አርብ ባለው ቀነ ገደብ ክፍያ ከፈፀሙ በድልድል ውስጥ ይካተታሉም ተብሏል።

አሁን ባለው ወቅታዊ ሁኔታ ምክንያት ወልድያ፣ እንጅባራ ከተማ፣ ዳሞት ከተማ፣ ወሎ ኮምቦልቻ፣ ደሴ ከተማ እና ሰሜን ሸዋ ደብረ ብርሀን እንደማይሳተፉ ሲታወቅ ሁኔታዎች ወደነበሩበት ሲመለሱ ሊካተቱ እንደሚችሉ ተገልጿል።