የኢትዮጵያ ከ20 አመት በታች ብሄራዊ ቡድን ለ2017 የዛምቢያ ከ20 አመት በታች ዋንጫ ማጣርያ ዝግጅት አሰልጣኝ ግርማ ሀብተዮሃንስ እና ረዳቶቹ ሲሳይ አብርም እና ፀጋዘአብ አስገዶምን በመመደብ ባለፈው ሳምንት ወደ ዝግጅት ቢገባም በየእለቱ ለቡድኑ የሚጠሩ ተጫዋቾች መብዛት ለአሰልጣኞቹ ስራ አዳጋች እየሆነ መምጣቱ ታውቋል፡፡
ከ20 አመት በታች ቡድኑ ባለፈው ሳምንት 38 ተጫዋቾችን በመምረጥ ዝግጅት ቢጀምርም በእድሜ እና ከተስፋ ቡድን ተጫዋቾች ባለመመረጣቸው ምክንያት ጥያቄ በማጫሩ ከ20 በላይ ተጨማሪ ተጫዋቾች በጊዜያዊ ስብስብ ውስጥ ተካተዋል፡፡ በምርጫው ላይ ክለቦች ተጫዋቾቻቸው እንዲመረጡ ጥያቄ በማቅረብ ቡድኑ በተጫዋቾች ብዛት እንዲጨናነቅ እንዳደረጉት ለሶከር ኢትዮጵያ የደረሳት መረጃ ያመለክታል፡፡
በአሁኑ ሰአት ከ20 አመት በታች ቡድኑ ከከፍተና ሊግ ፣ ከፕሪሚየር ሊግ ፣ ከክልል ክለቦች እና ከተስፋ ሊግ የተውጣጡ ከ50 ተጫዋቾች በላይ በመያዙ የአሰልጣኝ ቡድኑ የመጨረሻዎቹን 25 ተጫዋቾች ለመምረጥ እርስ በእርስ ማጫወትን መርጧል፡፡ ትላንት እና ዛሬ ቡድኑን 4 ቦታ በመክፈል እያንዳንዱ ጨዋታን ለ45 ደቂቃዎች በማድረግ ተጫዋቾችን ለመለየት ጥረት የተደረገ ሲሆን የከፍተኛ ሊግ ጨዋታ አድርገው የተመለሱ ተጫዋቾችን ያካተተ የምርጫ ጨዋታ ዛሬ ተደርጓል፡፡ በምርጫ ጨዋታው አማካኝነት 18 ተጫዋቾች ትላንት የተቀነሱ ሲሆን በነገው እለት ተጨማሪ 13 ተጫዋቾች ተቀንሰው የመጨረሻዎቹ 25 ተጫዋቾች ይታወቃሉ ተብሏል፡፡
