የወቅቱ የሊጉ አሸናፊ ኢትዮጵያ ንግድ ባንክ ወሳኙን ተከላካይ በክለቡ ለማቆየት መስማማቱ ታውቋል።
በአፍሪካ መድረክ በቻምፒዮንስ ሊጉ ኢትዮጵያን የሚወክለው ኢትዮጵያ ንግድ ባንክ ውላቸው የተጠናቀቁ እና አዲስ ፈራሚዎችን ወደ ቡድኑ ለማምጣት እየተንቀሳቀሰ የሚገኝ ሲሆን ጋናዊውን ተከላካይ ካሌብ አማንኩዋ ለተጨማሪ ዓመት በቡድኑ ውስጥ ለማቆየት ከተጫዋቹ ጋር መስማማቱ ታውቋል።
በተጠናቀቀው የውድድር ዓመት ወደ ኢትዮጵያ ከመምጣቱ በፊት በሀገሩ ጋና ዌስት አፍሪካ ፉትቦል አካዳሚ፣ አዱዋና ስታርስ እና ኧርትስ ኦፍ ኦክ ይጫወት የነበረው ካሌብ አማንኩዋ ለመጀመርያ ጊዜ ወደ ኢትዮጵያ በመጣበት ዓመት ስኬታማ ቆይታ በማድረግ ቡድኑ በታሪኩ ለመጀመርያ ጊዜ የሊጉን ዋንጫ እንዲያነሳ በማስቻሉ በኩል ቁልፍ ሚና ከነበራቸው ተጫዋቾች መካከል አንዱ ነበር።
አሁን ለዕረፍት በሀገሩ የሚገኘው ካሌብ ቡድኑ ቅድመ ውድደር ዝግጅት በሚጀምርበት ወቅት ወደ ኢትዮጵያ በመምጣት የወረቀት ሥራዎችን በመጨረስ ፊርማውን እንደሚያኖር ያገኘነው መረጃ አመላክቷል።
