በመቻል የአንድ ዓመት ቆይታ የነበረው ጋናዊ ተከላካይ ወደ አዞዎቹ ቤት አምርቷል።
በአሰልጣኝ በረከት ደሙ እየተመሩ በክለቡ መቀመጫ ከተማ የቅድመ ውድድር ዝግጅታቸውን ማድረግን የቀጠሉት አርባምንጭ ከተማዎች በዝውውር መስኮቱ ይሁን እንዳሻው ፣ ካሌብ በየነ ፣ ሙሉጌታ ካሳሁን እና ፋሪስ ዓለዊን ከፕሪምየር ሊጉ ሲያስፈርሙ ትላንት ደግሞ ከባህር ማዶ ኢድሪሳ ኦጎጆ የተሰኘን ቶጓዊ ግብ ጠባቂ ማስፈረማቸው ይታወሳል።
ትላንት ማምሻውን ደግሞ ጋናዊውን ተከላካይ ስቴፈን ባዱ አኖርኬን የግላቸው አድርገዋል ፤ ተጫዋቹ በሀገሩ ክለቦች ቢ ኤ ዩናይትድ ፣ አዱዋና ስታርስ እና በረኩም ቼልስ የተጫወተ ሲሆን በኦማን ሊግ ለሚሳተፈው ሶሀር እንዲሁም በኩዌት ሊግ ለሚገኘው አል-ታዳሞን ግልጋሎት ሰጥቷል። በተጠናቀቀው የውድድር ዘመን ወደ ኢትዮጵያ የተዋወቀው ስቴፈን በመቻል ቤት ጥሩ የሚባል ጊዜን ካሳለፈ በኃላ የተከላካዩ ቀጣይ መዳረሻ አርባምንጭ ሆኗል።
