ዋልያዎቹ ከኢትዮጵያ መድን ጋር ባደረጉት የአቋም መፈተሻ ጨዋታ ላይ የመስመር አጥቂው ጉዳት አስተናግዷል።
በአዳማ ዩኒቨርስቲ ሜዳ ከኢትዮጵያ መድን ጋር የአቋም መለኪያ ጨዋታቸውን አድርገው አንድ ለምንም የረቱት ዋልያዎቹ በሁለተኛው አጋማሽ በጨዋታው መጠናቀቂያ አስር ደቂቃ ሲቀረው የመስመር አጥቂው መስፍን ታፈሰ ጉዳት በማስተናገዱ ምክንያት ተቀይሮ ከሜዳ ለመውጣት ተገዷል።
መስፍን ያጋጠመው ጉዳት የጠንቻ መሳሳብ መሆኑን ያረጋገጥን ሲሆን ተቀይሮ ከሜዳ ሲወጣም ከፍተኛ የሀዘን ስሜት ተስተውሎበታል።
የተጫዋቹ የጉዳት መጠን ምን ያህል ከሜዳ እንደሚያርቀው የብሔራዊ ቡድኑ የህክምና ቡድና በቀጣይ ቀናት የሚያሳውቅ ቢሆንም ሶከር ኢትዮጵያ እንዳገኘችው መረጃ ከሆነ ተጫዋቹ ከጉዳቱ ለማገገም ቢያንስ ከአንድ እስከ ሁለት ሳምንታት እንደሚያስፈልጉት ለማወቅ ችለናል።
በዚህ መነሻነት በቀጣይ ሳምንት መጨረሻ ወደ ዳሬ ሰላም ከሚያቀናው የብሔራዊ ቡድኑ ስብስብ ጋር መስፍን ታፈሰ ወደ ስፍራው አብሮ የመጓዙ ነገር አጠራጣሪ አድርጎታል።
