በምሽቱ መርሃግብር ኢትዮጵያ ንግድ ባንክ በመጨረሻዎቹ ደቂቃዎች በተቆጠሩ ግቦች አዳማ ከተማን በመርታት ከወራጅ ቀጠናው አንሰራርተዋል።
በመጨረሻ ጨዋታቸው በመቐለ 70 እንደርታ ሽንፈትን ያስተናገዱት አዳማ ከተማዎች ለዛሬ ጨዋታ ባደረጓቸው ስድስት ለውጦች ዳንኤል ተሾመ ፣ ኃይለሚካኤል አደፍርስ ፣ እልያስ ለገሠ ፣ ፉዓድ ኢብራሂም ፣ ሙሴ ኪሮስ እና ስንታየሁ መንግሦቱን አስወጥተው በምትካቸው ናትናኤል ተፈራ ፣ መላኩ ኤልያስ ፣ ሳዲቅ ዳሪ ፣ ሱራፌል ዓወል ፣ ሬድዋን ሸረፋ እና ቢኒያም አይተንን ተከትው ሲቀርቡ በአንፃሩ ኢትዮጵያ ንግድ ባንኮች ደግሞ ከስሑል ሽረ ጋር ነጥብ ከተጋራው ስብስብ ባደረጓቸው ሁለት ለውጦች ተስፋዬ ታምራት እና ብሩክ እንዳለን ወደ ተጠባባቂ ወንበር በማውረድ በምትካቸው ቢኒያም ካሳሁን እና አዲስ ግደይን ተጠቅመዋል።
በኢትዮጵያ ንግድ ባንክ አንፃራዊ የበላይነት በጀመረው ጨዋታ የመጀመሪያው የተሻለ ሙከራ ግን ማድረግ ችለው የነበሩት አዳማ ከተማዎች ነበሩ ፤ በ10ኛው ደቂቃ ከቆመ ኳስ በጀመረው የማጥቃት ሂደት አሜ መሀመድ ከሳጥን ጠርዝ ያደረጋትን ሙከራ ፓላክ ቾል በግሩም ሁኔታ አድኖበታል።
ምንም እንኳን ይበልጥ አውንታዊ በመሆን በተጋጣሚ አጋማሽ አመዛኙን ጊዜ ለማሳለፍ የሞከሩት ኢትዮጵያ ንግድ ባንኮች በማጥቂያው ሲሶ የነበራቸው አፈፃፀም አንገት የሚያስደፋ ነበር ፤ በአንፃሩ አዳማ ከተማዎች ደግሞ ከጉዳት የተመለሰውን አምበላቸውን ቢኒያም ዓይተንን ማዕከል ባደረጉ ሂደቶች ጥቃቶች በመልሶ ማጥቃት ለመሰንዘር የሞከሩበት አጋማሽ ነበር።
የሃል አጨዋወት እጅጉን በተበራከቱበት የሁለቱ ቡድኖች የመጀመሪያ አጋማሽ የጨዋታ ክፍለ ጊዜ ሁለቱም ቡድን እንዳገኟቸው የቆሙ ኳስ አጋጣሚዎች ብዛት አጠቃቀማቸው የተዳከመ በመሆኑ መጠቀም ሳይችሉ አጋማሹ ተፈፅሟል።
ከመጀመሪያው አጋማሽ እምብዛም ባልተለወጠ መልኩ በቀጠለው የሁለቱ ቡድኖች ጨዋታ በ61ኛው ደቂቃ ካሌብ አማንክዋህ ከሰራው የማቀበል ስህተት በተገኘ ኳስ አዳማዎች በግሩም የቅብብል ሂደት የፈጠሩትን ያለቀለት አጋጣሚ ሱራፌል ዓወል በደካማ እግሩ ሞክሮ አመከናት እንጂ አዳማ ከተማዎች ቀዳሚ ማድረግ የምትችል አጋጣሚ ነበረች።
ከግቡ ሙከራ ውጭ ባሉ መመዘኛዎቹ በጨዋታው የተሻሉ የነበሩት ንግድ ባንኮች በ88ኛው ደቂቃ ላይ ቀዳሚ የሆኑበትን ግብ አግኝተዋል ፤ ተስፋዬ ታምራት ከቀኝ መስመር ያሻገረለትን ኳስ በነፃ አቋቋም ውስጥ ሆኖ ያገኛት ኤፍሬም ታምራት በግንባሩ በመግጨት ቡድኑን ቀዳሚ ማድረግ ችሏል።
በግቧ ይበልጥ የተነቃቁ የሚመስሉት ኢትዮጵያ ንግድ ባንኮች በተጨማሪ ደቂቃ ላይ ኪቲካ ጅማ በረጅሙ የተጣለለትን ኳስ ከአዳማ ተከላካይ ጋር ታግሎ በመግባት ከአዳማው ግብ ጠባቂናትናኤል ተፈራ አናት በላይ ለማስቆጠር የሞከራት ኳስ ዳግም ስትመለስ አግኝቶ በማስቆጠር ለቡድኑ ወሳኝ ድል ሲያስገኝ በአንፃሩ አዳማ ከተማዎች በሜዳቸው አራተኛ ተከታታይ ሽንፈት እንዲያስተናግዱ አስገድዷል።
