አቤል ያለው ከጊዛው ክለብ ጋር ያለው እህል ውሃ ያበቃ ይሆን?
ባለፈው የውድድር ዓመት አጋማሽ ከስድስት ዓመታት ተኩል የቅዱስ ጊዮርጊስ ቆይታ በኋላ ወደ ግብፁ ‘Zed’ ያመራው አጥቂው አቤል ያለው ከጊዛው ክለብ ጋር ያለው እህል ውሃ ወደ ማብቃቱ የደረሰ ይመስላል።
ከወራት በፊት ከ ‘Enppi’ ጋር በተደረገው ጨዋታ ላይ 73ኛ ደቂቃ ላይ ተቀይሮ ገብቶ ከተጫወተ ወዲህ ቡድኑን ያላገለገለው እና በቅርብ ሳምንታት በተካሄዱ የግብፅ ፕሪምየር ሊግ ጨዋታዎች በቡድኑ ስብስብ ውስጥ ያልተካተተው ተጫዋቹ እስካሁን ድረስ ከግብፁ ክለብ ጋር በይፋ ባይለያይም ሶከር ኢትዮጵያ ባገኘችው መረጃ መሰረት የመለያየት ዕድሉ የሰፋ እንደሆነ ለማወቅ ተችሏል።
እግርኳስን በአቃቂ ነው የጀመረው ፈጣኑ አጥቂ ከዚ ቀደም በሀረር ሲቲ፣ ደደቢት፣ ፋሲል ከነማ፣ ቅዱስ ጊዮርጊስ እና በኢትዮጵያ ብሔራዊ ቡድን ማገልገሉ ሲታወስ አሁን ደግሞ ከአንድ ዓመት የ’Zed’ ቆይታ በኋላ ከክለቡ ጋር ለመለያየት ተቃርቧል። ሶከር ኢትዮጵያም እንደተለመደው የተጫዋቹን ሁኔታ እየተከታተለች የምታደርሳቹ ይሆናል።
