ኢትዮጵያ መድን ስድስተኛ ተከታታይ ድሉን በማስመዝገብ በአልቀመስ ባይነቱ ቀጥሏል።
ሀድያ ሆሳዕናዎች በወልዋሎ ሽንፈት ካስተናገደው ቋሚ አሰላለፍ ሳማኪ ሚኬል፣ ሳሙኤል ዮሐንስ፣ አስጨናቂ ፀጋዬ እና ፀጋአብ ግዛው በያሬድ በቀለ፣ ሄኖክ አርፊጮ፣ በየነ ባንጃ እና ተመስገን ብርሀኑ ተክተው ሲገቡ ኢትዮጵያ መድኖዥ በበኩላቸው ኢትዮጵያ ቡና ላይ ውል ካደረገው ቋሚ ለውጥ ሳያደርጉ ወደ ሜዳ ገብተዋል።
እንደተጠበቀው ብርቱ ፉክክር የተደረገበት የሳምንቱ ታላቅ ጨዋታ በመጀመርያዎቹ ደቂቃዎች ተመጣጣኝ ፉክክር የታየበት ቢሆንም የኋላ ኋላ የኢትዮጵያ መድኖች ብልጫ የታየበት ነበር። በኳስ ቁጥጥርም ሆነ የግብ ዕድሎች በመፍጠር ረገድ የተሻሉ የነበሩት መድኖች በአጋማሹ እንደነበራቸው ብልጫ በርከት ያሉ ሙከራዎች ማድረግ አልቻሉም፤ ሆኖም መሐመድ አበራ በግራ መስመር በኩል ሰብሮ በመግባት አሻምቷት ከግቡ አፋፍ የነበረው ረመዳን የሱፍ ባመከናት ወርቃማ ዕድል እና ወገኔ ገዛኸኝ ከመአዝን አሻምቷት አቡበከር ሳኒ በግንባሩ መቷት ግብ ጠባቂው ባዳናት ሙከራ ግብ ለማስቆጠር ጥረት አድርገዋል። ጥሩ የመከላከል አደረጃጀት የነበራቸው እና በመልሶ ማጥቃት የግብ ዕድሎች ለመፍጠር ጥረት ያደረጉት ነብሮቹም እዮብ አለማዮህ ከቅጣት ምት በቀጥታ መቷት አቡበከር ኑራ በመለሳት ኳስ እና በተመሳሳይ ሄኖክ አርፊጮ ከቆመ ኳስ አሻምቷት ሚልዮን ሰለሞን በስህተት በግንባሩ ወደ ራሱ ግብ መቷት ግብ ጠባቂው በድንቅ ቅልጥፍና ባወጣት ኳስ ግብ ለማስቆጠር ሙከራዎች አድርገዋል።
ከመጀመርያው አጋማሽ የተለየ መልክ የነበረው እና ብርቱ ፉክክር የታየበት ሁለተኛው አጋማሽ ነብሮቹ በአንፃራዊነት የተሻለ እንቅስቃሴ ያደረጉበት ነበር።
በሁለቱም ቡድኖች እንደነበረው የማጥቃት ፍላጎት በርከት ያሉ ሙከራዎች ያልታዩበት አጋማሹ ነብሮቹ ወደ ግብ በመድረስ ነገር ባሳዩት ብልጫ ቢጀምርም ግብ በማስቆጠሩ ረገድ ቀዳሚ የነበሩት ግን መድኖች ነበሩ፤ ዳዊት ተፈራ ከሳጥኑ ውጭ አክርሮ በግሩም ሁኔታ ያስቆጠራት ግብም መድንን መሪ ማድረግ ችላለች።
ከግቧ መቆጠር በኋላ መድኖች በመከላከሉ ረገድ ነብሮቹ ደግሞ በማጥቃቱ ረገድ ጥሩ እንቅስቃሴ ማድረግ ቢችሉም በርከት ያሉ ንፁህ የግብ ዕድሎች አልተፈጠሩም። በመድን በኩል በመሓመድ አበራ እና ዳዊት ተፈራ በሀድያ ሆሳዕና በኩል ደግሞ በሄኖክ አርፊጮ እና ተመስገን ብርሀኑ የተደረጉ ሙከራዎችም የተሻሉ ለግብ የቀረቡ ነበሩ። በተለይም በረከት ወልደዮሐንስ ከሳጥኑ ጠርዝ አከባቢ አክርሮ መቷት አቡበከር ኑራ ከመለሳት በኋላ ከግቡ ቅርብ ቦታ የነበረው ተመስገን ብርሀኑ ከመረብ ጋር ቀላቀላት ተብሎ ሲጠበቅ ሚልዮን ሰለሞን በድንቅ የመከላከል ብቃት ወደ ውጭ ያወጣት ነብሮቹን አቻ ለማድረግ የታቀረበች ወርቃማ ዕድል ነበረች።
ድንቅ ፉክክር ያስመለከተን የሳምንቱ ተጠባቂ ጨዋታ በመድን አሸናፊነት መጠናቀቁ ተከትሎ ሀድያ ሆሳዕና ሁለተኛ ተከታታይ ሽንፈት ስያስመዘግብ ኢትዮጵያ መድን በ32 ነጥብ መሪነቱን አስቀጥሏል።
