በጨዋታ ሳምንቱ የማሳረጊያ መርሃግብር ዐፄዎቹን ከብርቱካናማዎቹ ላይ ወሳኝ ሦስት ነጥብ ወስደዋል።
ድሬዳዋ ከተማ በመጨረሻ የሊግ ጨዋታቸው በቅዱስ ጊዮርጊስ በተሸነፉበት ጨዋታ ከተጠቀሙበት ቋሚ አሰላለፍ ሦስት ለውጦችን ያደረጉ ሲሆን አላዛር ማረነን በአብዩ ካሳዬ ፣ ጀሚል ያዕቆብን በድልአዲስ ገብሬ እና አቡበከር ሻሚልን በመስዑድ መሐመድ ተክተው ሲገቡ ፋሲል ከነማ በበኩላቸው ከመቻል ጋር ነጥብ ከተጋራው ስብስብ በተመሳሳይ ባደረጓቸው ሦስት ለውጦች ሀቢብ መሐመድ ፣አቤል እንዳለ እና ቃልኪዳን ዘላለምን አሳርፈው በምትካቸው አንዋር ሙራድ፣ ጃቢር ሙሉ እና ተካልኝ ደጀኔን ይዘው ለዛሬው ጨዋታ ቀርበዋል።
ሁለቱን ባሳለፍነው ጨዋታ ሳምንት አራፊ የነበሩ ቡድኖችን ያገናኘው የሳምንቱ ማሳረጊያ ጨዋታ የመጀመሪያዎቹ 10 ደቂቃቃዎች ብርቱካናማዎቹ የኳስ ቁጥጥር የበላይነት ውስደው ቢቆዩም በሙከራዎቹ ረገድ ግን ዳካማ የነበሩበት ሲሆን ዐፄዎቹ በአንፃራዊነት በፈጣን ሽግግር ቀዳሚ ለመሆን ኳሶችን ወደ ሦስተኛው ሜዳ ክፍል በመጣል ግብ ለማግባት ሲጥሩ ያስተዋልንበት ነበር።
የተዳከመ የማጥቃት እንቅስቃሴ እያስመለከተ በቀጠለው አጋማሹ ዐፄዎቹ ወደፊት በመሄድ ረገድ በአመዛኙ ብልጫ ቢወስዱም ይህ ነው የሚባል ሙከራ ለማድረግ 28 ደቂቃ ለመጠበቅ ተገደዋል።
በ28ኛው ደቂቃ በመጀመሪያ ሙከራቸው ቀዳሚ መሆን ችለዋል ፤ ከማዕዘን ምት የተሻማውን ኳስ ተጨራርፎ የደረሰው ሀብታሙ ተከስተ ኳሷን በግንባሩ ገጭቶ ወደ ግብ ሲሞክር የብርቱካናማዎቹ ተከላካዮች ለመመለስ ጥረት ቢያደርጉም ኳሱ ከመረብ ጋር ተገናኝቶ መሪ እንዲሆኑ አስችሏቸዋል።
ግብ ካስተናገዱ በኋላ የአጨዋወት ስልታቸውን የቀየሩት ብርቱካናማዎቹ የአቻነት ግብ ፍለጋ በርከት ብለው ወደ ተቃራኒ ቡድን ግብ ክልል በመድረስ ከመጀመሪያዎቹ ደቂቃዎች የበለጠ ሲንቀሳቀሱ ያስተዋልን ሲሆን 35ኛው ደቂቃ ላይ አብዱሰላም የሱፍ በቅብብል የተገኘውን ኳስ አክርሮ በመምታት ያደረገው ሙከራ በግቡ ቋሚ ብረት ለትንሽ ርቆ ያለፈበት ጠንካራ ሙከራ ውጪ ሌላ የዐፄቹን ተከላካይ መስመር የፈተነ እንቅስቃሴ ሳያደርጉ አጋማሹ ተገባዷል።
ጨዋታው በሁለተኛው አጋማሽ ተመልሶ ዐፄዎቹ መሪነታቸውን ያሰፉበትን ፈጣን ግብ ገና አጋማሹ እንደተጀመረ በሰከንዶች ልዩነት አስቆጥረዋል ፤ የብርቱካናማዎቹ ግብ ጠባቂ አብዩ ካሳዬ በረጅሙ የለጋውን ኳስ የዐፄዎቹ ተከላካዮች መልሰውት ከተከላካዮች ጀርባ ተጥሎ አንዋር ሙራድ በፍጥነት ደርሶ ወደግብነት ቀይሮ መሪነታቸውን ወደ ሁለት ከፍ ማድረግ ችሏል።
ቶሎ ቶሎ ወደፊት በመሄድ ግብ ለማግኘት በሚደረጉ እንቅስቃሴዎች የደመቀው አጋማሹ 53ኛው ደቂቃ ላይ ሲደርስ ብርቱካናማዎቹ የግብ ልዩነቱን ማጥበብ እንዲችሉ ያስቻለችን ግብ አስቆጥረዋል።
በአንድ ሁለት ቅብብል የተገኘውን ኳስ አብዱሰላም የሱፍ በቀኝ መስመር በኩል ሆኖ ወደ ሳጥን ሲያሻማ ሙኸዲን ሙሳ በግሩም ሁኔታ በግንባሩ ገጭቶ ወደ ግብነት ቀይሯታል።
ጨዋታው ከደቂቃ ደቂቃ ፈጣን የማጥቃት እንቅስቃሴዎችን እያስመለከተ ሳቢ እየሆነ ቀጥሎ ቡድኖቹ ተመጣጣኝ የሚባል እንቅስቃሴ እያደረጉ በመልሶ ማጥቃት የግብ ማግባት ሙከራዎችን አድርገዋል።
ብርቱካናማዎቹ ጫና ፈጥረው የግብ ሙከራዎችን ማድረጉን ቢቀጥልም ዐፄዎቹም ነጥቡን ለማስጠበቅ ወደኋላ ከማፈግፈግ ይልቅ ተጨማሪ ግብ እያነፈነፉ በርከት ያሉ አጋጣሚዎችን ለመፍጠር ወደ ፊት በመሄዳቸው እንዳሰቡት ሳይሆንላቸው ቀርቶ ጨዋታው ተጨማሪ ግብ ሳይቆጠርበት 2-1 በሆነ ውጤት በዐፄዎቹ አሸናፊነት ተጠናቋል።
